كوفية ياسر

الكاتب: موفق مطر

كوفية على وسادة..خالية ..
دافية مركونة
كوفية رسمها خارطة وطن
عجبهته عكتافه ..
بدلة زيتوني عاشماعة الزمن ..
زي شجرة زيتون مقدسية
تبرق ..زي النجوم أزرارها
من وهج الشمس
بالصقر مزيونة
كوفية وعقال من هالة المسيح ..
عصدر ختيار حكيم
بعز الشباب فدائي ..
هز بارود العز ..
بيوم الفتح .. بالكرامة
شد بايده فجر ..
يضوي عتمة ليل ظالم ..
وخيمة كانت حبالها عالريح
قوية متينة
أبو عمار ياسر مع أصحاب عرب سمر أقحاح
دمهم عربي .. دربهم فلسطينية
هواهم صحرا العرب
وانهار فدا طاهرة نقية
روافد للقلب ..
دم عروبي ..
كرام بظل العلم ..أحرار
هامات لأجلهم انحنت الرايات
بالشرق بالغرب ..
بفيتنام الشمال
بأفريقيا الجنوبية
ياسر فدائي عاصخر الزمن ضرب
فجر ..مزن السما
تتحيا في الأرض
باذن رب المطر
عظام أمة نخرتها الهزيمة
كوفية على وسادة تتكي ..
تسأل . . محتارة ..للرب تشتكي
ليش اللي حملني عاهامته رمز .
.أربعين سنة رمز البلاد .. كنعانية
ليش رحل اللي بريحة البارود عشّقني ..
واللي عمل من غصن الزيتون تاج للسلام ..للانسانية .
أنا اللي عرفته بالهامة ..
بالشام ..بالحّمة .. بالأغوار..بالكرامة
وصدى كلمات أبو علي إياد للختيار
معلقة فيني وصية
وصية للأحرار ..ما تركعوا ..
خليكوا واقفين ..
حتى لو صار الهوا سموم..
والرمل قبور
مانخاف المنية
ماركعنا ..أشهد انا كوفيته ..
عرفته بعش النسور ..
براشيا ..تنسمت هوا البلاد من الشقيف ..
بالنبطية
يوم مالصخر ولع نار وشاب الولد ..
وعجّزت الصبية
كنت معه ببيروت تسعين يوم ..
بخلدة والمتحف ...
كان صامد ..
كلاشنكوف بايده ..
يحمي شرف العرب
يصد الغزو جحافل ..
والعواصم يا خلتي نايمه ..
عورتها مكشوفة ..
مش مستحية
كوفية ياسر تحلف يمين
والله ..أبو عمار ما زعل مني
طول عمري ..عاجبهة ابو عمار مرفوعة ..
أنا بنت أصل كنعانية
يلوح بالفرح دلعونة ...
دبكة رجال في العرس غنية
كنت عا راس ياسر ابن القدس علامة ..
نسجني بنول الزمن
عندي أسراره ..
لما نادى عالعرب
تيقيموا الصلاة
عند البراق ..
في المهد بالأقصى
بالقدس جماعية
كوفية شفت الموت ..
عاأبو عمار هاجم
وكيف الموت كان يموت ..
وتبقى روح الوطن والفدائي .. فلسطينية
هيك حب الوطن
هيك الفدا
هيك بنرفع راية الوطن
وراسنا للسما مرفوع
بكل الفخر نقولها
هون كنا وراح نكون .. حنا الفلسطينية.