ع_نكشة: القروووض!

الكاتب: بثينة حمدان

#بلد_عايشة_ع_نكشة: شو علاقتكم بالقروض؟ بالنسبة إلي بتقدروا تقولوا بلشنا نتعلق ببعض، الشهر الي ما بيسحبوا فيه من راتبي بحس اني مش عايشة؟ في شيء ناقص، لما تتأخر الرواتب بزعل عشان القرض، عشان بنكي حبيبي ما يزعل مني! بتقدروا تقولوا وررررطة مرتبة! قال قرض قال!!

علاقتك بالقرض بتبلش متل الزواحف، الفكرة بتزحف شوي شوي ع مخك وانت مبسوط، واخر الزحف بكون بيت الأحلام أو سيارة الأحلام بانتظارك. البيت كأنه قصر يا زلمة! والسيارة بتبين زي الجاكوار حتى لو بدك تشتري سيارة صرصورررر وعالديزل.

المهم ببلش القلق من لحظة ما تلاقي البيت، وتتفق مع المالك (المالك واااال جد كلمة حلوة هيك بتحس إنه المالك مش متلنا وإنه مصنوع من الذهب.. الذهب الخاالص.. نياله المالك... بلا حسيدة طبعاً)

المهم بتعملوا اتفاقية وبتوقعوها عاساس انك الشاري وهو البايع (زي الي عنجد) ولفترة بتصدق انك الشاري والجيبة فش فيها ولا مليم الله وكيلك بححححح (أقلك انت مش عارف اذا رح تقدر تعفش وتسكن، بس وكلها لربك.. بيجي الصبي وبتيجي رزقته معه) الله وأكبر حتى الرزقة رابطينها بالصبي!! -دخيله الله-

وهيك بتقدموا طحشة اوراق للبنك، ومنها تخمين لسعر البيت، لأنه بيجوا اثنين مخمنين بقدروا ثمن الشقة، للحظة بتحس أنهم رح يسقطولك قلبك، وبتنامش ليلتين، قال واحد منهم قعد يلف حولين العمارة (ياهوووو عفكرة البيت فوق، أنا يا دوب اقدر اشتري الشقة)

وبالآخر بتمشي الأمور مع المخمنين ومع البنك الي معاملته معك بتكون غير شيكل، كأنك مش انت الي بدك تدين منه، يا اخي بحسسوك إنك انت الي دافع للبنك، بتيجي لحظة بتحس حالك فعلاً عميل مميز، بتحس للحظات انك مالك (صحيح من برا هلا هلا ومن جو يعلم الله) بس صيت غنى ولا صيت فقر.

بتيجي موافقة البنك.. تقول نتائج توجيهي، المهم بتفرح، وبيعطيك البنك معظم قيمة الشقة حسب المخمنين، ممكن يطلع عليك 14 دولار لازم تدفعهم من جيبتك للبنك -تستغربش- ولااااي 14 بس! ولكم أنا الي بدفع. ومن هاي اللحظة رح تضلك تدفع للأبد (مبروك البيت)

قال بيجوا الناس يباركلوك بالبيت وبسألوك: شو بدك تحلينا.. ع شو بدك تعزمنا!!! كمان فوق القرض والبلاوي والديون الزرقاء الي دفعناها بدكم أحليكم!! (يحلي وبرهم اليهود)

طبعاً ما بتتعلم وبترجع تحلم: فجأة رح يصير معي مصاري وأسدد القرض كله واخلص، بس بصحيك موظف البنك الي بحبك وبقلك اذا سددت القرض كامل لازم تدفع عمولة سداد مبكر! شووووووو

في الحقيقة أه لما تصحى، بتلاقي حالك قاعد ع كومة ديون، المهم حيطة إلك (مرهونة للبنك!) بس إلك، فعلاً القروض بتشبه القرود، صحيح بتشتريها وبتملكها بس بتظل تنطنط فوق راسك زي القرود، لا انت قادر تمسكها، ولا قادر تفرح فيها...

مبروك البيت.. مبروك السيارة

جاييتكم أيام تووووووووت